 |
 |
 |
Ieder woort al aongekondeg tot Zienen Hoegen Hoeglöstegheid veur ’t iers in de Mestreechse historie versterking krijg vaan twie jonge prinseleke collega’s. Gruuts en mèt väöl plezeer onthölle de Tempeleers en CV de Kikkers noe ‘t allerierste ‘Jäöghoeglösteg paar vaan Groet Mestreech’.
Op 21 jannewarie 2023 zien geproclameerd tot ‘Jäöghoeglösteg paar vaan Groet Mestreech’:
Prins “ Fen 1ste ”
Graof vaan de Menthabeemd,
Lienhier vaan’ Kindcentrum Anne Frank’
Besjermhier vaan de speulers JO11-1 vaan RKHSV
Liechtend veurgenger vaan ‘t nuie leech
Protectäör vaan de Mestreechter Jäög Vastelaovend
Prinses “Sky 1ste “
Graovin vaan de Oosterweertlaan
Hittepetit vaan `Kindcentrum Anne Frank`
Besjermvruiwke vaan de Scouting Fons Olterdissen meh speciaol vaan de Shanti’s
Liechtend veurgengster vaan ‘t nuie leech
Protectäör vaan de Mestreechter Jäög Vastelaovend
Zie zalle de jäög vaan Mestreech, Heugem/ Randwyck en wied daoboete, veurgoon in de Vastelaovend vaan 2023.
Prins “FEN 1e“ is 9 jaor en zit in gróp 6 vaan Kindcentrum “Anne Frank”, oonderdeil vaan sjaolegemeinsjap Mosa Lira. Ein vaan zien groetste hobbie’s is voetballe.
Heer späölt bij RKHSV JO11-1 en is daoneve bij eder thoeswedstrijd vaan eus MVV-ke te vinde. Wijer game op de playstation en ravotte op straot. Heer luustert nao de naom Fen Janssen en woent mèt zien pap en mam (Roy en Sanne), broor (Raf) en zusterke (Lot). Zien jäögprinselek pelies bevint zich op de Menthbeemd 7. Vasteaovend is häöm neet vreemp, ziene pap waor in 1990 Kikkerprins Roy 1e .
Prinses “SKY 1e” is 10 jaor en zit in gróp 6 vaan Kindcentrum “Anne Frank”, oonderdeil vaan sjaolegemeinsjap Mosa Lira. Zie is lid vaan Scouting Fons Olterdissen bij de Shanti’s en häör hobbies zien game, leze en films vaan Harry Potter kieke. Aofspreke met vrundinnekes is häör neet vreemp. Häöre groete druim um prinses te weure kump oet.
In ut börgelek leve luustert zie nao de naom Sky Goedkoop en woent met häör mam Mandy, breurke Jaylee en hunneke Myra. Häör jäögprinselek pelies bevint zich op Oosterweertlaan 64.
Vaanaof noe regere zie euver de Jäögvastelaovend in Groet Mestreech en zalle zie de koumende weke op ‘n aontal belaankrieke eveneminte hunne zwajeuze entree make:
Zaoterdag 28 jannewarie: Bekindmaking winner Kinderexpositie
Zoondag 29 jannewarie: Kinderfies (Complex)
Zaoterdag 4 fibberwarie: Jäögprinsetreffe (Rebelle)
Bastiaan Klomp, Prizzedent vaan de Tempeleers: “Vaan prinsekap en tiara tot e bekans identieke scepters en sirremoniemeisterstaaf, aon alle details is gedach. Op donderdag 16 fibberwarie kump d’r zelfs ‘n echte jäög-machseuverdrach boe-in ’t jäöghoeglösteg paar de mach zal hole en netuurlek zal ’t paar ouch mèt de drei zwoer, meh plezerege daog acte de présence geve.“
Zoe zalle zie op vastelaovendszoondag mèt insjete en naotot ‘t Mooswief is opgetrokke de jäögvastelaovend officieel opene mèt e gans nui symbool “’t Nui leech. “in de Mestreechter vastelaovend:
Denao zien zie in vol glorie te zien in de Groeten Optoch en op vastelaovendsmaondag in de Femilie Optoch. Op vastelaovendsdinsdag zalle zie op ‘t Vriethof roond 17.11 oor de Jäögvastelaovend aofslete.
